Vilt þú taka þátt í að þróa mest sótta vef landsins?

Hefur þú áhuga á að þróa lausnir sem eru notaðar af 340 þúsund notendum í hverri viku?

mbl.is vill ráða til sín öflugan einstakling sem hefur metnað fyrir og kröftuga sýn á framtíð fréttamiðlunar á vefnum. Starfið felur í sér forritun og þróun á mest sótta vef landsins, mbl.is. Vefnum er haldið úti af 5 manna hópi í fjölbreyttu og framsæknu starfsumhverfi og leitum við að sjötta einstaklingnum.

Við leitum að einstaklingi sem...

• hefur mikla reynslu af CSS, XHTML og Javascript
• hefur reynslu af vinnu í LAPP umhverfi, t. d.  Linux, Apache, PostgreSQL og PHP/Perl/Python og öðrum open-source hugbúnaðarlausnum
• tileinkar sér bestu tæknilausnir hverju sinni og hefur metnað fyrir viðmóti, virkni og vefhönnun
• hefur frumkvæði, er góður í samskiptum og á auðvelt með að vinna í litlum en kraftmiklum hópum

Þekking á MVC-miðuðum vefkerfum eins og Django, Ruby on Rails, Catalyst eða Symfony er kostur. Nýjungar á vefnum eru byggðar í Django/Python vefumhverfi og leitum við að öflugum einstaklingi til að taka þátt í endurmótun hans til framtíðar. 

Gott er að umsækjendur geti sýnt fullbúna vefi, kóðadæmi eða önnur sýnidæmi sem þeir hafa unnið.

Áhugasamir sendi umsókn ásamt ferilskrá á [e-mail]. Frekari upplýsingar veitir Soffía Haraldsdóttir, netstjóri mbl.is, í síma 569-1168.

Viltu vita meira um vinnustaðinn?

Starfsumhverfið á mbl.is einkennist að hluta til af stærri verkefnum sem taka nokkrar vikur í smíðum og sem 2-4 forritarar koma að, og að hluta af smærri verkefnum sem taka fáeinar klukkustundir og sem einn forritari sér alfarið um. Venjulega er hvort tveggja í gangi í einu, sem hefur í för með sér að starfið er mjög fjölbreytt.

Sem dæmi um nýleg stærri verkefni má nefna leiguvef mbl.is þar sem notendur geta í sérhönnuðu viðmóti leitað að húsnæði til leigu. Smærri verkefni felast yfirleitt í tilteknum endurbótum á undirvefjum eða bakendakerfum sem þegar eru til. Og svo er náttúrulega eitthvað um verkefni sem eru miðlungsstór og taka fáeina daga. Dæmi um slíkt er t.d. kosningaforritið fyrir alþingiskosningarnar í fyrra sem tók við hráum tölum um atkvæði, reiknaði út hverjir komust á þing og birti niðurstöðurnar jafnóðum og þær bárust.

 

Bakendi mbl.is byggir á Linux, Apache, PostgreSQL og Python/Perl, og hin tæknilega umgjörð starfsins einkennist af þessu. Starfsmenn nota ýmis stýrikerfi á sínum vinnustöðvum — allt eftir því hvað þeim þykir þægilegast hverju sinni. Þeir starfsmenn sem vinna á Linux nota annaðhvort Debian eða Ubuntu en netþjónar okkar sem eru þegar allt er talið um 10 talsins eru allir keyrðir á Debian.

Flestir skrifa kóða í Vim ritlinum en í gegnum tíðina hafa sumir starfsmenn einnig notast við t.d. Emacs , JEdit , TextMate eða Coda. Nánast allir starfsmenn nota Firefox vafrann að viðbættu Firebug og Web Developer Toolbar. Til að halda utan um og skipuleggja vinnuna notum við Basecamp frá 37signals. Til útgáfustýringar notum við Git.

Á svo lítilli deild er ekki hagkvæmt að greina sérstaklega milli framenda- og bakendaforritunar, þannig að oftast mun sami maðurinn skrifa bæði Python- eða Perl-kóða fyrir bakendann og XHTML og Javascript (gjarna með aðstoð jQuery) fyrir framendann. Á deildinni vinnur þó einn grafíker, sem gerir útlitsteikningar og býr til grafík fyrir vefinn eftir því sem þörf krefur.

Haustið 2008 var tekinn ákvörðun um að endurskrifa núverandi bakenda mbl.is og flytja hann úr Perl + Mason yfir í Python + Django, auk þess sem allar nýjar lausnir yrðu unnar í Django. Þessi vinna er enn í gangi, og mun halda áfram á næstu mánuðum. Á sama tíma er lögð áhersla á endurnýjun í viðmótshönnun og útliti með einföldun og léttleika að leiðarljósi.

mbl.is er vefmiðill sem um 340 þúsund vikulegir notendur sækja í viku hverri samkvæmt samræmdri vefmælingu. Í fjölmiðlamælingum hefur mbl.is verið sá miðill sem þjóðin ber mest traust til af einkareknum miðlum. Mikið er lagt upp úr að starfsmenn auki við sig þekkingu og tileinki sér bestu vinnuaðferðir og lausnir hverju sinni.